Calaranni

Mura... Lanterna... paci d'arbarìa...
Luntanu un cirruvìu ¹ chi si lamenta...
Un quatru: fra lu urgu ² e lu Ghiarìtu,³
'u suli 'nta 'na vampa pinnulìa.

'N terra, fraànza di bucàlia ⁴ e menta,
calìu ⁵ di fenu e virdi di vignìtu.
A mmari quagghiatùmi; ⁶ scogghi, rina,
e trisci ⁷ ‘n siccu e chianchi ⁸ e calacciùna.⁹

Varcuzza e nassi, li rizzagghi ^* stisi,
conzu, scupetti, lenzi, bullintina...
du' cani jttati all'arca, durmigghiuna.

E casa e vigna - arrassu ri ‘n Paisi -
unni la santa megghiu vinirata
pò essiri la vutti di l'annàta.

Vito